مين احنا؟

بلش الموضوع بقعدة رايقة في Azur بنتناقش في امور وشغلات مدايقتنا في البلد, ومنها النظافة. لحتى حدا فينا حكى: طيب ليش ما نعمل اشي؟ وهون بلش الشغل وبدينا نفكر كيف ممكن نحل مشكلة النظافة في البلد, واللي مدايقة الكل.

عملنا مجموعة اسمها "احنا البلد", وبدينا نخطط كيف نرفع مستوى التوعية ونخلي الناس تحافظ على نظافة البلد متل ما بتحافظ على بيوتها, ونوصل الفكرة للناس انه في كتير أضرار وأمراض ورا هاد الزبالة اللي معبية الشوارع ومناطق قريبة كتير من أماكن سكنهم.

خلال بحثنا لقينا فيديو لحملة صارت في استونيا, Let's Do it, نظفوا البلد في يوم واحد بس, وحسينا انه لازم هاد الفيديو يشجعنا لحتى نعمل هاد الاشي هون.

بعد فترة التقينا بارت واحد من مؤسسين 1%Club وخلال كلامنا جبنا سيرة "احنا البلد" وطلع بارت بعرف الناس اللي عملوا الحملة في استونيا وعرفنا عليهم. وقررنا نعمل نفس الشي اللي صار في استونيا وننضف البلد في يوم واحد! وبعد فترة استضافنا برنامج 1%Show اللي تابع ل1%Club وحكينا عن مخططنا, وهلأ همه عم يساعدونا لحتى نجيب دعم وننشر الحملة.

في حملة اسمها World Cleanup 2012 عاملينها Let's Do it وصارت فلسطين جزء من هاد الحملة. الهدف انه يصير مجموعة من الحملات لتنظيف مدن في مناطق مختلفة من العالم. لانه حسب الاحصائيات في حوالي ١٠٠ مليون طن من القمامة ملقاة بشكل غير قانوني في مناطق مختلفة من العالم. وازا نظرنا للمشكلة بنلاقي انه هاد مش مسألة جمالية وبس, كمان هيه مسألة صحية ومسألة تعاون ومسؤولية. 

رح يكون الهدف من حملتنا ننظف رام الله ونرفع مستوى الوعي والمسؤولية ناحية البلد. ورح نحتاجكم ونحتاج دعمكم ومساعدتكم في كل خطوة, لانه بدونكم ما فينا نعمل شي. والخطوة الاولى انك تعمل like لهاد الصفحة وتخبر صحابك عنها لحتى ينتشر الخبر والكل يعرف بالحملة.لانه قريبا جدا رح نحتاج مساعدتكم كلكم.